Die meeste van ons sal onsself nie as ryk beskou nie. Afhangende van jou omstandighede, beskou jy jouself seker as iewers tussen “middelklas” en … nie so welaf nie. Maar dan stap jy verby daardie ou wat op straat bedel. . .

Dit lyk soms so onregverdig dat mense se finansiële situasie dikwels bepaal word deur die familie waarbinne hulle gebore is en die omstandighede waarin hulle grootgeword het. Hoekom is dit? Hoekom doen God nie iets daaraan nie?

Wel, eintlik het Hy reeds. Vandag se skrifgedeelte is veral vir diegene van ons wat onsself as “middelklas” beskou – ons oorleef, maar ons is beslis nie ryk nie.

Deuteronomium 15:7,8 As daar in een van die dorpe in die land wat die Here jou God aan jou gee, ‘n arme is, ‘n mede-Israeliet, moet jy nie hard en suinig wees teenoor so ‘n broer van jou wat arm is nie. Wees vrygewig teenoor hom en leen hom wat hy nodig het.

Dit is ongelooflik hoe verwronge ons perspektief, te midde van die gemak van ‘n middelklasbestaan, raak. Die waarheid is, dat indien jy toegang tot skoon drinkwater het; genoeg kos het om te eet, ‘n dak oor jou kop het en klere om aan te trek, is jy oneindig ryk, selfs al beskou jy jouself nie as ryk nie.

Wat het God dan vir die armes gedoen? Hy het vir jou en vir my geroep om, met ‘n vrygewige hart, gewillig te wees om hulle te help.

Ja, mense is as gevolg van verskillende redes arm. Dis nie vir ons om te oordeel nie. God roep ons nie om selfvoldaan en selfsugtig te wees nie. Inteendeel: jy moet nie hard en suinig wees teenoor so ‘n broer van jou wat arm is nie.

Dit is God se Woord. Vars … vir jou … vandag.